Dy të rinjtë të cilët vodhën një javë më parë argjendarinë në qytetin e Shkodrës, kanë pranuar gjithçka.
23-vjeçari Françesko Vukaj dhe 28-vjeçari Iraldo Filipi pranuan të jenë autorë të grabitjes së 3 shkurtit në lagjen “Vasil Shanto” në Shkodër. Gjatë seancës gjyqësore, ku u vendos masa e “arrest me burg”, ata kanë pohuar se sendet e floririt që vodhën i shitën në Tiranë.
Policia e Shkodrës, i arrestoi autorët e grabitjes vetëm 4 ditë pas ngjarjes, pikërisht më 7 shkurt. Nga argjendaria mësohet se kanë marrë një shumë prej 4-5 milionë lekë të vjetër duke marrë bizhuteri.
Autorët udhëtonin me një automjet pa targa me të cilin goditën qepenin e dyqanit të argjendarisë. Pasi hynë brenda dhe vodhën ç’të mundnin, ata u larguan duke braktisur automjetin.
